الموضوع: مشكلة تسلط الاب والام على الطفل

مشكلة تسلط الاب والام على الطفل

يعني ايه اب وام متسلطين يعني بيفرضوا ع الطفل كل حاجة، بيتحكموا ف تصرفاته واختياراته، بيمنعوه حتى من رغباته ولو كانت مشروعه، وبيلزموه دايما بمهام وواجبات تفوق قدراته وبتخالف اهتماماته اصلا، وميمنعش اصلا ان عشان ده يحصل يستخدموا العنف او الضرب او الحرمان، وبتكون قائمة الممنوعات أكثر من قائمة المسموحات، مع تجاهل كاااااااامل لاحتياجات الطفل النفسية
كل ده تحت مبرر ايه بقي...؟
انا خايفه عليهم، هما معندهمش خبرة ف الحياة زينا، احنا نعرف مصلحتهم اكتر منهم، هما لازم يبقوا كويسين واحسن مننا عشان كده بنخططلهم حياتهم، هشد عليهم عشان يطلعوا متربين ورجالة، اكسر للبت ضلع يطلعلها ٢٤ وووو

لا لا يادكتور انا استحالة اعمل كده مع ولادي، انا متوازنة جدا ف تربيتهم
للأسف كتير جدا جدا من الامهات بتتسلط ع ولادهم ومش فاهمين ولا واعيين لكده..
تعالوا اقولكم شوية مواقف بتكرروها يوميا...

زي مثلا انك تفرضي على ابنك انه يلبس حاجة معينة او اكل معين او يصاحب ولاد معينين...
زي انك تقعني ابنك وانتوا بتختاروا لعبة من محل اللعب، لعبة معينة عشان انتي شايفة فيها فايدة محددة، وتخالفي رغبته ومتدهوش مساحته ف الاختيار..
زي مثلا تحاولي تقنعي بنتك بتخصص معين في الثانوية مخالف لرغباتها...

والنتيجة

  • هيكبر الطفل وعنده ميل شديد للخضوع واتباع الآخرين ميقدرش يبدع ولا يفكر ولا يقول رأي ولو شد حيلة شوية واخد قرار ميقدرش يتحمل تبعاته..
  • شخص قلوق وخايف دايما من السلطة ومن اي موقف ف مواجهه، لانه اتعود يواجه الناس من خلال ماما او بابا.
  • حساس جدا ومعندهوش ثقة ف نفسه خالص لانه اصلا مش عارف قدراته ولا اختبارها ف مواقف فعليه.
  • مهما يعمل عنده شعور أنه مقصر ودون المستوي وميستحقش الشكر.
  • وأحيانا بتلاقي الطفل عدواني، يخرب ويكسر ويبوظ ويشتم وبيحاول يسيطر ع المواقف بطريقة سلبية.

ارجوكم كفاااااية فرض سيطرتكم ع الاطفال وسيبولهم مساحة يتنفسوا ويتعلموا من تجاربهم